En galego!
Pasado xa un mes de aulas, os Comités Abertos de Estudantes na comarca da Coruña veñen de denunciar a falta de compromiso dalgúns profesores e profesoras de Ensino Medio e Bacharelato que non están a cumprir o decreto 124/2007 do 28 de Xuño, polo que se regula o uso e a promoción do galego no sistema educativo, que entrou en vixencia neste mesmo curso.

Este Decreto contou dende o primeiro momento co apoio desta organización, proporcionándolle ao alumnado unha boa competencia en lingua galega repercutindo de forma máis que positiva no seu uso, cousa que até o de agora, non sucedía.

Con todo isto, os Comités Abertos de Estudantes da Coruña, veñen de presentar unha campaña de galeguización do ensino, desta volta, adicado ao profesorado para animarlles a cumprir a lei e deixar de colaborar co etnocidio cultural que supón a escasa presenza do galego no ensino. Estamos ante a mellor situación posíbel para que a situación cambie.

O ensino galego, grazas a este Decreto, avanza considerabelmente cara o obxectivo final de termos un ensino esencialmente en galego. Para os Comités Abertos de Estudantes da Comarca da Coruña é importantísimo a normalización da lingua neste ámbito, pois do ensino depende en gran medida o emprego do galego polas novos.

A normalización lingüística ven avalada polo recoñecemento que o galego ten no Estatuto como lingua propia de Galiza, isto é, como lingua autoxerada polo pobo galego e falada no seu territorio durante séculos

Esta organización, dentro da campaña que se está a desenvolver na Coruña, organizarán un envío masivo de cartas aos seminarios dos institutos desta comarca, animando aos profesores e profesoras a sumarse a loita por un ensino en galego.