25 de Novembro
Día Internacional para a eliminación da violencia contra as mulleres

No primeiro encontro feminista de Latinoamérica, celebrado en Bogotá en 1981, decidiuse declarar o 25 de Novembro “Día Internacional para a Eliminación da Violencia contra as Mulleres”. Esta data foi escollida para conmemorar o asasinato das irmás Mirabel por orde do dictador dominicano Trujillo en 1960.

As máis de 50 mulleres mortas a mans dos seus compañeiros no que vai de ano son unha mostra máis de que este problema segue presente na nósa sociedade. Dende a Comisión da Muller dos Comités Abertos de Escola e Facultade (CAF) queremos denunciar as distintas formas de violenza que seguimos a sofrer as mulleres en tódolos ámbitos (discriminación laboral, publicidade sexista, empobrecemento, tráfico de mulleres, distinto acceso á educación e diferenciación de roles, etc) e, moi especialmente os malos tratos, os asasinatos, as violacións, o acoso sexual e a violencia en xeral cara as mulleres.

A discriminación da muller, e a violenza contra ela como unha das súas manifestacións, responde á sociedade patriarcal na que vivimos. A súa eliminación só será posíbel mediante un cambio nos valores e actitudes que se transmiten dende a educación, os medios de comunicación e tamén da Universidade, que se atopa nunha situación privilexiada de cara a contribuír á plena igualdade da muller en tódolos ámbitos. É por esto que os Comités seguimos a demandar a implantación da coeducación na universidade e a eliminación da imaxe sexista e da linguaxe sexista da docencia e defendemos o ensino do papel da muller en tódalas áreas do saber. Así mesmo, reclamamos unha presencia das mulleres nos órganos de goberno da universidade parella ao acceso das mulleres á universidade no último tempo.

Por todo isto, convidamos ás mozas do país a autoorganizarnos, de cara a seguir defendendo a eliminación de todo tipo de discriminación contra as mulleres, para poder construir unha sociedade máis igualitaria e xusta.

NEN AGRESIÓNS FÍSICAS,
NEN DISCRIMINACIÓN SOCIAL

Comisión Nacional da Muller