Os CAF denunciamos a incompatibilidade de bolsas no SUR.

Segundo a convocatoria do Servizo Universitario de Residencias publicada pola USC para o curso 2005-06, todos aqueles residentes que sexan beneficiarios dunha bolsa da convocatoria xeral do Ministerio de Educación e Ciencia serán incluidos, de xeito automático, na cota F (a máis alta, sen ningún tipo de subvención). Esta medida vén motivada pola definición, por parte do MEC ,da incompatibilidade das devanditas bolsas coas subvencións das residencias públicas. Porén, os residentes beneficiarios das cotas máis baixas, aqueles cuns ingresos menores, deberían renunciar á súa bolsa e, polo tanto, ao seu medio básico para a subsistencia e de mantemento do seus estudos- para poderen continuar coas súas actuais cotas.
Isto conduce ao Servizo Universitario de Residencias a unha situación segundo a cal todos os estudantes cuns ingresos baixos, e polo tanto con dereito a percibir unha bolsa do MEC, non poderán acceder a unha praza subvencionada, prazas destinadas aos estudantes con menor renda. Dende os Comités Abertos de Faculdade reclamamos a inmediata retirada desta medida, que convertería ás residencias públicas en aloxamentos só ao alcance daquelas persoas que, polas súas elevadas rendas, non precisen dunha bolsa para costear os seus estudos. Non debemos esquecer que as bolsas que dende a administración do Estado se destinan aos estudantes universitarios teñen coma principal destino o pagamento de transporte e aloxamento, polo que a incompatibilidade que agora se impón sobre as prazas subvencionadas é, de seu, un ataque contra os propios principios do SUR, definidos no seu regulamento.
No caso de que se manteña a incompatibilidade que agora se anuncia, as persoas que perciban unha bolsa do MEC deberán pagar a mesma cota que aqueles estudantes cunha renda superior aos 9000€ anuais e que, polo tanto, non precisan unha bolsa para costear os seus estudos.