Os CAF reclamamos o inicio da reforma dos Estatutos do SUR

Debemos garantir, con este reordenamento, a pervivencia e funcionamento democrático das residencias públicas da USC.

Gran parte do futuro das residencias públicas da Universidade de Santiago pasa pola vindeira reforma dos estatutos do Servizo Universitario de Residencias (SUR). Este reordenamento atinxe a aspectos clave no mantemento das condicións básicas desta infraestrutura, esencial para aqueles estudantes que non poden acceder a un aloxamento en Compostela por causa dos seus escasos recursos económicos, así como a outras cuestións das que dependerá en gran medida que se garanta a democracia nos órganos de decisión dos diferentes centros do SUR.Dende os órganos de goberno da Universidade –a Vicerreitoría de Estudantes ata o pasado curso e a de Extensión Cultural na actualidade, así como a propia Reitoría- veñen adiando ano tras ano as reformas e, simultaneamente, están a mostrar gran parte dos seus proxectos de futuro de cara ao mantemento e mellora das condicións das residencias públicas.
Dende os Comités Abertos de Facultade reclamamos o inicio dun proceso de revisión estatutaria no SUR transparente e democrático, que procure coma prioridade esencial a garantía de acceso ás prazas públicas de aloxamento aos estudantes que máis o precisan. Do mesmo xeito, consideramos que é estremadamente urxente que os procedementos de goberno que pouco ou nada teñen que ver coas formas democráticas varíen substancialmente. Así, reclamamos que a reforma dos estatutos do SUR serva para que os órganos de goberno en que os residentes están representados, os Consellos de Residentes, deixen de posuír un carácter consultivo e se lles outorgue a capacidade de decisión que lles corresponde.
Por outra banda, é inxustificábel que centros pertencentes a unha institución pública como son as residencias baseen o seu funcionamento en direccións designadas directamente dende a correspondente Vicerreitoría. Así, atopámonos con que os principais afectados polas decisións das persoas situadas á fronte de cada un dos centros, os residentes, son privados do dereito a facer escoitar a súa voz, xa sexa directamente ou por medio dos seus representantes nos Consellos. Dende os CAF esiximos, unha vez máis, o estabelecemento de mecanismos democráticos de elección nas direccións e subdireccións das residencias, coa fin de garantir que estas son administradas por persoas realmente válidas para a tarefa e, ademais, eliminar definitivamente os cargos mantidos por medio de designacións directas, que en gran parte das ocasións constitúen un verdadeiro mecanismo de pago de favores e un auténtico mercadeo de intereses entre persoas de determinadas tendencias e organizacións.
En síntese, os Comités Abertos de Facultade continuaremos pulando pola reforma integral dos estatutos do SUR, así como pola recolleita, nestes novos estatutos, de aspectos básicos como son:
• Garantía de acceso ás prazas aos estudantes con menores recursos económicos.
• Atribución de capacidade de decisión real aos Consellos de Residentes.
• Estabelecemento dun proceso de elección democrático das direccións dos centros.
Somentes deste xeito poderemos garantir o futuro dun servizo esencial na universidade pública, tanto no que atinxe ao mantemento e ampliación de prazas, coa fin de que estas sexan suficientes para todos os estudantes que as precisen, coma no referido ao funcionamento transparente das institucións e órganos directores que as substentan.