O idioma na Universidade Galega

Ao achegarmonos á situación do galego nas tres universidades debemos ter en conta tanto os usos como as actitudes dos colectivos que as integramos: non só o alunado, mais tamén especialmente o uso na docencia, xa que este marca muitas veces o uso do galego entre os estudantes.

De revisarmos os dados que nos fornecen as proprias universidades, podemos observar que a competencia en galego é praticamente total o alunado, mais só é lingua habitual de aproximadamente um terzo dos estudantes, uns dados bastante homoxéneos en todo o país. Estes
dados contrastan co menor uso na escrita, o que leva a constatar non só un uso ainda diglósico, senón tamén o fracaso da Xunta na sua política lingüística e a falta de apoio das Universidades ao noso idioma para facilitar o uso escrito dos galegofalantes, como os escasísimos textos técnicos á sua disposición, logo de muitos anos. Entre o profesorado nas aulas a situación varía por universidades: mentres o da U. Vigo ten uns índices de uso perto do 30% na docencia, a USC non pasa do 17%, mentres que a UdC só o 12% se imparte na nosa lingua.

Mais estes dados na docencia non se corresponden coas actitudes favorábeis á lingua: todo o alunado galego mostrase a favor de incrementar a docencia en galego, até esta ser a lingua maioritaria do ensino. Así o reflecten os estudos, o que unido á demora histórica na normalización por parte das sucesivas reitorias, que non teñen redactado planos de normalización até hai escasos anos, mesmo a UdC sen un nesta altura, debido a máis de dez anos de Meilán Gil como reitor, fan urxente unha implicación total para converter en realidade algo que na nosa organización levamos reclamando con todo o estudantado desde sempre: um ensino en galego. Así, as perspectivas son boas se existe un compromiso real, e as medidas imediatas son muitas: á parte da total galeguización interna e externa de todo o material da Universidades ou de garantir onde se desdobren grupos que sempre exista un en galego, criar comisións de normalización a nível de centro ou planos a nível de universidade como medidas iniciais, nas aulas é hora de criar prazas de perfil lingüístico vinculadas á docencia en galego para garantir un direito que é sistematicamente vulnerado: estudar no nosso país no nosso idioma.

Os CAF-CAEF, desde o noso compromiso absoluto coa lingua desta nación, seguiremos a exixir o cumprimento de todos as medidas xa existentes, seguiremos apoiando todas as iniciativas que xurdan a prol do idioma e seguiremos reclamando os nosos direitos lingüísticos até termos, ademais de púbico e de cualidade, un ensino galego.