comités abertos de escola e faculdade

Os CAF organizan unhas Xornadas sobre a Globalización

Os Comités Abertos de Escola e Faculdade da Faculdade de CC. Económicas e Empresariais da Coruña organizan unhas Xornadas sobre a globalización co seguinte programa no que destaca a conferencia de Xosé Manuel Beiras (Catedrático de Estructura Económica da USC e Presidente do Consello Nacional do BNG), así mesmo e de salientar que se concedera un crédito de libre configuración pola UdC a todo aquel que se matricule e asista as charlas. A Matrícula e Gratuíta e se realizará unha hora antes da primeira conferencia en postos que os CAF colocaran á entrada da Faculdade e do proprio Salón de Graos.

PROGRAMA DAS "XORNADAS SOBRE A GLOBALIZACIÓN"

DATA: 20 e 21 de Abril
LUGAR: Aula Magna e Salón de Graos da Facultade de Económicas.

Martes 20 de abril do 2004

10:45 h Apresentación

Salón de Graos
11:00 h Conferencia de:
Manuel Mera Sánchez (Secretario de Formación Sindical e Migración da CIG e representante da mesma no FSM).
14:00 h Tempo para perguntas e intervencións.

Salón de Graos
14:30 h Conferencia de:
Carlos Ballesteros (Profesor da U.P. de Comillas Empresario e defensor da integración étnica e a alter-globalización)
20:00 h Tempo para perguntas e intervencións.

Mércores 21 de abril do 2004

Salón de Graos
11:00 h Conferencia de:
Antonio López Rivera (Secretario Comarcal de CIG-Metal en Ferrolterra e Traballador de Izar)
14:00 h Tempo para perguntas e intervencións.

Aula Magna
16:30 h Conferencia de:
Xosé Manuel Beiras Torrado (Catedrático de Estructura Económica da USC)
20:00 h Tempo para perguntas e intervencións.

voltar á portada

Reválida e Aceso á Universidade

Os Comités Abertos de Estudantes (CAE) e os Comités Abertos de Escola e Faculdade (CAF), queremos facer patente o noso profundo rexeitamento do Real Decreto de desenvolvimento da Lei de Ordenación da Calidade do Ensino (LOCE) que, aprobado polo Consello de Ministros do Governo central o pasado venres, 19 de Decembro, regulará o aceso ao ensino superior a partir do próximo ano 2005.

As “novidades” anunciadas no Real Decreto veñen-nos dar a razón a aquelas/es que desde a comunidade educativa viñemos denunciando a falsidade dos anúncios da Ministra de Educación, Pilar del Castillo, proclamando “a fin da selectividade”.

O feito de desapareceren as PAAU actuais non implica que desaparezan as trabas de aceso ao ensino superior, que é o que a maioria do estudantado galego veu demandando nas últimas duas décadas. Moi ao contrário, con esta “reforma” a selectividade actual non só non desaparece senón que se multiplica: ainda que aprobemos todas as matérias do Bacharelato e obteñamos un bon expediente, as/os estudantes veremos como se nos volve examinar outra vez de todo o anterior antes de que nos den o noso título.
Mais, como se a reválida non fose suficiente, agora resulta que as universidades tamén poderán fixar os seus próprios critérios de selección e aceso, que poderán ir desde unha proba escrita até unha simples entrevista persoal. Este non só será un sistema pouco obxectivo e onde se poden ver en perigo os princípios de igualdade, mérito e capacidade; trata-se, ademais, dunha perigosa via para a criazón de centros e titulacións de primeira e de segunda en universidades públicas, onde determinadas e determinados estudantes non nos poderemos matricular ainda que teñamos Bacharelato aprobado. E todo isto sen contar coa selectividade económica (taxas e prezos públicos a cada máis elevados; bolsas a cada máis insuficientes), que non desaparecerá precisamente.

Asi mesmo, rexeitamos o fundo carácter centralista que o MEC dará á futura PGB, impondo-a como proba única para o estudantado de todo o Estado cuns mesmos contidos fixados polo próprio Ministério, dando só a concesión ás “comunidades con lengua co-oficial” de incluiren a maiores unha proba referida á língua e á literatura próprias. Ve-se claramente como o PP quer voltar para o franquismo non só nas formas, mais tamén no fundo.

Os CAE e os CAF facemos un vivo chamamento a toda a comunidade educativa da Galiza para, no marco da Plataforma Galega pola Defesa do Ensino Público, da que facemos parte, artellar unha resposta contundente diante das lesivas políticas educativas do Governo Central do Partido Popular e do desleixo e incapacidade da Xunta á hora de defender as suas competéncias exclusivas en matéria educativa.

Os CAF Denuncian que a Xunta Adicará Menos Cartos a Educación
Recentemente foron aprobados no Parlamento da Galiza os Orzamentos Xerais da Xunta para o ano 2004 grazas aos votos do Grupo Parlamentar do PP, que rexeitou os centos e centos de emendas apresentadas pola Oposición.
Os Comités Abertos de Escola e Faculdade (CAF) queremos denunciar, máis un ano, que os novos orzamentos dedicarán menos cartos ao ensino público e, en xeral, serán menos que o pasado ano as partidas dedicadas á Consellaria de Educación e Ordenación Universitária. Desta forma, confirma-se a tendéncia dos últimos anos baixo os governos do Partido Popular de reducir gasto público en Educación, xa de por si escaso de termos en conta que, ademais, a Consellaria que dirixe Celso Currás dedicou boa parte dos diñeiros con que contou a favorecer e potenciar o ensino privado e concertado frente ás necesidades da escola e da universidade pública galegas.

Resulta intolerábel que a Xunta e o Partido Popular se neguen a destinar maiores dotacións económicas ao ensino público galego dadas as suas apremiantes necesidades e dado o período de cámbios en que nos atopamos a dia de hoxe na Universidade galega, en pleno proceso de adaptación á LOU e cando está a piques de se iniciar o proceso de converxéncia co novo Espazo Europeu de Educación Superior de forma xeneralizada.
Para os CAF é máis que urxente que a Xunta asuma a débeda que neste momento ten contraída coas tres universidades do país e faga o posíbel para solucionar a catástrofica situación financeira en que se atopan, especialmente a Universidade de Santiago (USC), en situación de bancarrota técnica.
E é que debido á negativa da Xunta de abordar de vez a aprobación dun novo Plano de Financiamento Plurianual para as universidades (o anterior, de 2000-2003, remata con este ano) estas non teñen, en moitos casos, nen sequer cartos en líquido para cousas tan fundamentais como xices, mobiliário ou fichas para o profesorado.

Unha das condicións indispensábeis para que o Espazo Europeu de Educación Superior acordado en Boloña se poda tornar en realidade no noso país e non ficar reducido a unha enteléquia máis é a converxéncia co resto de países europeus en matéria económica, antes que en nengunha outra. Cómpre que o governo galego asuma de vez as suas responsabilidades e aposte pola modernización e fortalecimento do Sistema Universitário Galego, aumentando o investimento público, duplicando o número de bolsas e as suas cuantias, investindo máis cartos dedicados á investigación e permitindo a contratación de máis profesorado en condicións de estabilidade laboral, asi como mediante o aumento do gasto público por estudante. Todo iso para termos na Galiza unha Universidade pública moderna que poda seguir a cumprir coas suas funcións esenciais: a vertebración e o desenvolvimento do país e a transformación da realidade mediante o estudo, a decéncia e a investigación.

Selección Galega Xa
Un grupo de rapazas/es galegas/os, decidiron montar un día un foro de debate para demandar a creacion dunha selección galega xa dunha vez. Pese ás dificultades iniciais, hoxe o foro ten xa 80 rexistrados, entre os cales hai xente de moitas peñas de fútbol galegas, xente de Ourense, Vigo, Lugo, Coruña, A Mariña, Ferrolterra, Compostela, Pontevedra e outros moitos pontos de Galiza.

A páxina que vos recomendamos é http://siareiros.webcindario.com.

A Aplicación da LOU na Galiza: A nosa Alternativa
Coa entrada en vigor da LOU (Lei Orgánica de Universidades) en Xaneiro de 2002 abria-se unha nova etapa: a sua aplicación no Sistema Universitário Galego (SUG), que se concretizaba na adaptación da lexislación galega en matéria universitária (LOSUG) e mais dos estatutos das tres universidades galegas á nova lei.

A LOU foi criticada por centralizadora, invadindo competéncias o governo central que até entón foran exclusivas das comunidades autónomas. Aprobada a LOU, algunhas desas competéncias son agora do MEC ou de algun dos organismos criados por este. Outras muitas, embora, seguen a ser da Xunta da Galiza. A ela pedímos-lle os CAF-CAEF, como outros sectores e colectivos, que fixese valer as suas competéncias exclusivas en matéria educativa e apostase por unha Lei Galega de Universidades que servise para contra-restar os efeitos máis negativos da LOU e fortalecer un marco universitário público propriamente galego. A Xunta renunciou, porén, a ese obxectivo desde o primeiro dia: contra o solicitado por reitores, organizacións sindicais e estudantis, plataformas de profesorado...o Conselleiro de Educación e Ordenación Universitária, Celso Currás, anunciaba a sua intención de lexislar "por tramos" a aplicación da LOU no noso país, a diferenza do feito en Catalunya, Euskadi ou Andalucia, e seguir na liña regresiva do governo central do PP canto á elaboración da LOU.

O Conselleiro de Educación priorizou neste tempo distintos aspectos da adaptación á nova lei universitária (os considerados "urxentes"): aos poucos meses saíu un Decreto de Contratación do Profesorado Universitário tan regresivo nos seus contidos como a própria LOU que incumpria as espectativas dos distintos sectores do profesorado e tamén dos reitorados. Posteriormente, o traballo centrou-se en elaborar leis específicas para o funcionamento dos Consellos Sociais das tres universidades, do Consello Universitário Galego e da Axéncia de Avaliación da Cualidade.
Algo que se podia agrupar nunha lei só ten-se feito en várias, o que desvirtua o contido da Lei Xeral de Universidades (LXU) anunciada polo Conselleiro Currás.
Porén, ainda que coxa, esa LXU terá que abordar temas mui importantes dos que até hoxe nada se ten falado e que preocupan muito os CAF-CAEF: os planos plurianuais de financiamento público das nosas universidades, as normativas de aceso ás mesmas após a "reválida" imposta tras a aprobación da LOCE, os planos de residéncias (SRU), o sistema e cuantia das bolsas e axudas ao estudo ou a presenza efectiva do galego na docéncia e investigación universitárias.

Frente a esta adaptación "por tramos" á LOU, a alternativa dos Comités Abertos de Escola e Faculdade foi clara desde o princípio, e asi lla manifestamos ao Director Xeral de Universidades cando nos recebeu en Xuño do pasado ano para falar sobre estes temas: a nosa aposta centra-se na elaboración dunha Lei Galega de Universidades que contemple todas as competéncias en matéria universitária que a Xunta poda asumir; lei cuxos obxectivos principais son suavizar no posíbel as consecuéncias máis negativas da LOU e fortalecer e dotar de futuro estábel un marco universitário nacional, público e de cualidade. Este obxectivo só é posíbel centrando esa lei precisamente nos temas dos que até o momento non se ten falado:
- Aumento do investimento público do 1% actual até o 1´5% do PIB no ensino superior galego a fin de garantir a converxéncia real cos países do noso contorno e a modernización efectiva do SUG. Programa de financiamento plurianual máis amplo que o actual que dote as universidades de maior estabilidade orzamentária.
- Criazón dunha normativa nacional de aceso ás universidades onde se garanta a igualdade de oportunidades de todas/os e e que ninguén teña de marchar fóra do país por falta de praza.
- Criazón dun plano de residéncias públicas que garanta prazas suficientes para un 14% do total de alunado matriculado en cada cámpus do país.
- Acrecentamento do número e cuantia das bolsas e axudas ao estudo da Xunta, aumentando o investimento público na matéria até equipará-lo á média da UE (0´24% desde o 0´06 actual). Transferéncia imediata da competéncia en matéria de bolsas á Xunta para seren xestionadas no país en base a critérios sócio-económicos próprios e non académicos. Incremento das axudas e bolsas para estudantes galegas/os que cursan no exterior titulacións non existentes na Galiza. Incremento considerábel das axudas para estudos ou estadias noutros países.

Pola Mellora Transporte Público na UdC
Desde os CAF e Galiza Nova queremos denunciar, unha vez máis, a precaria situación do transporte público na cidade da Coruña, en concreto no que refire aos Especiais da Universidade. Consideramos que este é un tema importantísimo, xa que logo o transporte constitúe un servizo de primeira necesidade para todos/as os/as estudantes. En xeral o estudantado realiza máis dunha viaxe diária en autobus urbano e a liña coa Universidade transporta anualmente ao redor de dous millóns duascentas mil persoas, máis á Compañia de Tranvias e ao Concello non parece importar-lles demasiado este feito e seguen a nos tratar como pasaxeiros de segunda ou terceira categoria.

Ninguén parece ter os ouvidos dispostos para escoitar peticións tan "atoladas" como:
· A mellora da frecuencia dos buses, sob de todo nas horas ponta co obxeto de reducir as masificacións.
· A reestructuración dos percorridos e horarios dos buses de bairro, que fan a viaxe de ida cara os cámpus mais non as de volta e non funcionan polas tardes.
· Reforzo da liña 24, que é a que na actualidade da servizo aos/ás estudantes de Filoloxia malia non ser unha liña universitária polo a súa frecuencia deixa bastante que desexar.
· A eliminación das trabas burocráticas para conseguirmas a tarxeta do bus xa que todos e todas deberiamos ter aceso a ela polo feito de sermos estudantes e a solicitude da súa progresiva gratuidade.
Mellora do estado e das condicións xerais dos buses que realizan o percorrido aos cámpus xa que, na maioria dos casos, trata-se dos vehículos máis antigos que posúe a Compañia de Tranvias.
· Mellora da frecuencia das liñas do Cámpus de Oza.

Suba das Taxas Universitarias
O comezo do curso semella ser sinónimo todos os anos dunha nova suba no prezo das taxas universitárias de matrícula. Ao igual que o curso pasado, a xunta de Galiza volveu decretar un aumento do 4% nos prezos públicos universitários; aumento que, outra vez, ten lugar par riba do IPC.A principal reivindicación da nosa organización neste início de curso será a conxelación, como mínimo, do prezo das taxas para o curso que vén, o aumento de financiamento público na Universidade até o 1,5% e a duplicación do número de bolsas e as suas cuantias até chega a média dos paises do noso contorno.