A suba das taxas

O SUR ten como finalidade esencial a de contribuír a reducir a desigualdade de oportunidades por motivos económicos, a través da convocatoria de prazas subvencionadas de aloxamento
Isto que acabas de ler non é unha definición de como nos gustaría aos CAF que fose o Sistema Universitario de Residencias (SUR), senón que é a propia definición do SUR que se recolle no artigo segundo do regulamento do mesmo (http://www.ti.usc.es/lexis/doc/regulsur_marco.htm). A priori parece unha obviedade comentar isto, mais agora que xa falta menos para que remate o curso é cando hai que lembrarllo con máis énfase ao equipo reitoral, xa que sempre aproveitan estas datas para aprobar a modificación das taxas e das cotas do SUR.
No curso 2002-2003 subiron as taxas un 13%, o curso pasado subiron un 7% e moi probablemente este curso volvan subir unha porcentaxe moi similar. Estas constantes subas alonxan de xeito significativo ao SUR da súa propia finalidade de ser un servizo para reducir as desigualdades económicas. Tamén son bastante escuras xa que os criterios empregados non se axustan aos que habitualmente se empregan para a revisión de taxas de servizos públicos, sendo por excelencia o IPC, que o curso pasado estaba moi por debaixo do 7%, que foi a porcentaxe aplicada ás taxas do SUR.
Unha nova suba nas taxas do SUR significaría encarecer un servizo que é básico para a comunidade universitaria, polo que reivindicamos que para o próximo curso, como mínimo, queden conxeladas as taxas do SUR.
Por outra banda, dende os CAF queremos denunciar que o propio equipo reitoral xa non disimula a súa intención de atacar ao SUR como un servizo básico. Recentemente publicou unha guía do SUR onde se dicía textualmente que “poden beneficiarse del tanto aquelas persoas que teñan unha renda alta como as que a teñan baixa”(www.usc.es/estaticos/servizos/sur/pdf/guia2005.pdf), contradicindo totalmente o propio regulamento do SUR (art.2).
Dende os CAF vemos con preocupación como o SUR está dentro dunha dinámica que o alonxa do seu principal cometido e que o achega cada vez máis a un proceso de privatización que se reflicte nas constantes subas das taxas e na publicacións de guías como a que acabamos de citar polo que agora máis ca nunca é necesario que loitemos por un SUR público e de calidade.