Transporte Universitario na UdC

Desde hai anos os Comités Abertos de Escola e Faculdade (CAF) levamos denunciando a suba desmedida do custo do transporte universitario, e o recorte dos servizos, como a desaparición dos buses de bairro, que chegaban ás zonas mais afastadas do centro da cidade. Os CAF iniciamos por isto neste cuadrimestre unha campaña pola mellora do transporte universitario na que queremos contar coa forza de todo o estudantado.

Transporte na cidade da Coruña

A suba da todas as tarifas de Bus na cidade da Coruña ten sido espectacular, sen relación coa suba do IPC: para que os prezos do transporte público se correspondesen con ela habería que conxelar o prezo por 15 anos! E todo isto tendo en conta que falamos do transporte público, que debería abaratarse, e que teoricamente se quere potenciar desde o Concello.
Se analisamos a situación concreta do transporte universitario, atopámonos perante unha situación aínda pior, como podemos ver comparando co resto das universidades do País: tanto na Universidade de Santiago de Compostela, onde o Concello asume a subvención dun Bono-Bus para os universitarios, como na Universidade de Vigo onde tamén se dá a mesma situación.
Mentres, na Universidade da Coruña non existe un bono-bus universitario universal, xa que o Concello estima que nen somos un colectivo específico que requira esa atención nen pensa que sexa unha medida que cadre coa súa suposta política de “esquerdas”: así os universitarios temos que usar o bono-bus xeral de 63 céntimos, mentres que só un moi reducido número de estudantes desfrutan do bono-bus subvencionado a 40 céntimos.
Ademais a actual equipa reitoral, logo de mais de dous anos, segue sen cumprir as promesas que aparecían no seu programa eleitoral: uns bonos de mes a 15 euros para todos os universitarios e outros a 9 euros reducidos para rendas baixas.
Ante esta precaria situación os CAF exiximos as seguintes medidas:

- Bono Bus universal para calquera universitario.
- Liñas ás zonas máis afastadas do centro da cidade.
- Liña intercampus.

Transporte Comarcal

Os estudantes que moran na comarca da Coruña están a sofrer uns servizos precarios e de alto custo, situación que os CAF queremos mudar coas seguintes medidas:

- Que a UdC encabece o proceso de creación dun servizo diario de baixo custo para os universitarios que viven fora do termo municipal da Coruña.
- Liñas dende os concellos da Comarca directas aos Campus.

Transporte Ferrol-Terra

A comarca de Ferrol-Terra sofre tamén duns servizos de transporte público sobre os que compre actuar, os CAF exiximos medidas elementares como:

- Incremento das frecuencias.
- Rebaixa no custo
- Axeitamento dos horarios ás necesidades dos estudantes.

Transporte Nacional

Moitos dos estudantes da UdC proceden de diversos pontos do País aos que retornan de xeito habitual. A pesar diso, os universitarios non desfrutan de nengún desconto específico para eles, polo que os CAF reclamamos:

- Tarifas especias, equivalentes ás do Carné Xove, para os universitarios nos distintos transportes: autobuses e transporte ferroviario especialmente.